三番四次想寫blog,但一直都實行唔到----(唉…肥人係懶架喇)笑。人要求變架,所以2014年就決定寫blog,分享我嘅最愛----拉麵。
頭先所講,拉麵係我嘅最愛。但係其實愛拉麵咩先!好奇心極重嘅我就係愛佢夠千變萬化,千奇百怪。都係唔好吹咁多無謂嘢喇,火速介紹我想同各位分享嘅拉麵店啦!
第一間介紹嘅就係位於東京江東區深川嘅----こうかいぼう!
要去呢度(如果由新宿出発),可以由新宿坐JR山手線到高田馬場,之後再坐Metro東西線到門前仲町駅落車,歩行7至8分鐘就到架喇。(最緊要係要坐Metro東西線)
舖頭係由店主兩夫婦獨力經營,上至接客料理,下至洗碗清潔,都係由佢地打理。由於店主太愛拉麵,要日日食先頂到條拉麵癮,所以用心鑽研,希望打做出一碗營養高,好似味噌湯一樣營養價値高(日本人和式早餐通常都會有白飯及味噌湯),毎日支持客人一天工作嘅開始。
店舖以全木裝修,加上店主兩夫婦嘅熱情招待,令店舖更warm。
温馨提示:由於木場及如果要去門前仲町公司寫字樓比較多,同時亦屬於拉麵激戰區,所以記得唔好午飯時間去呀!
講返主角拉麵先,全店只有一款拉麵----鹽味拉麵(600円)
千其唔好俾佢平凡普通嘅外表令你食慾大減呀!排左接近45分鐘,我第一眼見倒佢都打左個凸,好似好普通,一貫拉麵嘅材料:葱、叉燒、荀、同一小塊紫菜。但我飲一啖湯,咬一啖麵同叉燒,我即刻係個心度同店主夫婦連番道歉。其實呢碗拉麵嘅食材並非平價料,
湯好濃,飲得出鮮味,再加上日本魚仔干嘅鮮甜微苦、昆布嘅海洋香氣,同天然海鹽産生化學作用,令此湯變成好有深度嘅一碗!好似平靜嘅大海,捲起巨浪,拍打味蕾!嘩!超精彩!
麵係由琦玉県丸富製麵出品嘅20号中太蛋麵,由於麵嘅加水量低,與濃湯簡直就係絶配。麵質彈牙爽口,另外以蛋代替礆水,令麵少左難聞嘅礆水味,多左一陣微弱嘅蛋香。
至於叉燒亦非常精彩,店主選用日本國産豬肉,肉質又滑又嫩,並無豬騒味,煮得又入味,入口即化,仲有少少鹹香味。俾着香港嘅拉麵店,厚切一小塊,肉質口感一定又粗又鞋唔入味,佢雖然細細片,但味道以及口感極佳,富有層次。
至於另一位主角----就係佢喇!
日式叉燒飯(300円)
日本人物盡其用就出晒名架啦,店主利用切得唔完整嘅叉燒,加上鹽燒紫菜碎上,最後淋少少叉燒汁,就成為舖頭另一主打。煮得嫩滑嘅叉燒,由於帯有一點鹹香,但唔會鹹死人個隻,配合白飯,食起上嚟有點似鹹牛肉。將飯、叉燒、加上脆口紫菜一齊放入口,個一刻覺得自己非常幸福,真係超正!
同時亦有叉燒飯套餐(850円)及拉麵套餐(700円)
大家如果到東京玩,有時間有機會真係要嚟一試!
專業推介指數:
註:推介指數最高為5
店舖資料:
地址:東京都江東區深川2-13-10 ニックハイム深川101
星期一、二、四、五:上午11:00至15:00 / 17:30至賣完
星期六及公眾假期:上午11:00至賣完
店舖例休日:逢星期三及日